Mpho ya Moswananosi, (Paperback)

Matome Lestah Sewapa ke mongwadi wa puku ya "Mpho ya moswananosi". Mongwadi o belegwe ngwageng wa 1988 motseng wa Mawa Block 8, tikologong ya Bolobedu ga Kgosi/gadi Modjadji, Seleteng sa Mopani, Porofenseng ya Limpopo, nageng ya Afrika Borwa. Leeto la gagwe la dithuto le thomile sekolong sa digotlane sa Thako moo a alogilego ka ngwaga wa 1993 go ya go thoma mphato wa 1 sekolong sa tlasana sa Mawa. O rile go aloga mphatong wa 7 ka ngwaga wa 2000, a ya go phetha mphato wa marematlou sekolong seo se phagamego sa Mpedi Bapeding motseng wa ga-Masipa ka ntlenyana ga toropo ya Mokopane, Seleteng sa Waterberg. Mongwadi o phethile lengwalo la borutisi elego Bachelor of Education Senior and FET le Bachelor of Arts Honours in African Languages (Northern Sotho) Yunibesithing ya Limpopo ngwageng wa 2012 le 2014, ka tatelano. O thomile go soma sekolong sa Modumo seo se phagamego ka ngwaga wa 2013. Ga bjale mongwadi ke morutisi wa Sepedi Leleme la gae sekolong seo se phagamego sa Karabi fao a thopilego difoka tse mmalwa sedikothutong sa Moloto, tsa go hwetsa 100% dipoelong tsa mphato wa 12. Puku ye ya "Mpho ya moswananosi" ke maiteko a pele a bongwadi bja dipuku tsa Sepedi Leleme la gae.